إبن الحلال المحترم
بقلم / امانى صلاح الدين
إهداء إلى إبن الحلال / إبراهيم حسن
زوجى الحبيب بارك الله فيه
إبن الحلال المحترم
آية ونموذج فى الكرم
فى الدنيا هو دنيتى
ف الآخرة نارى وجنتى
من يوم كتابى ما انكتب
عهدى معاه حب وأدب
عودنى دايماً على المودة
إن كان فى ضيق واللا فى شدة
فى الحر نسمة حنينة
فى البرد صوفة مبطنة
مكانتى عندى فى السما
تقديره ليا ملحمة
ابن الحلال المحترم
آية ونموذج فى الكرم
خلافنا دايماً بالإحترام
آخر مودة وإنسجام
عتابه سرى وفى الخفا
عتاب رقيق كله دفا
القلب زى التلج لونه
مكانى دايماً جوه عيونه
عينيه ما تشوف غيرى أنا
إن كان بعيد واللا هنا
باله طويل مهما غضب
بالرفق واللين والأدب
وصية نبينا أدام عنيه
بيسمع كلامه أُمال إيه
ابن الحلال المحترم
آية ونموذج فى الكرم
بيتى نعيمه فى الإيمان
عشنا عليه من زمان
وبسنة حبيبنا المصطفى " صلى الله عليه وسلم "
عشنا حياة ود ودفا
رحمنا يوم لا نقطعه
والحقد يوم لا نزرعه
أهله وأهلى نحبهم
دايماً حقيقى نودهم
مشاكلنا بيننا نحلها
مهما كبر كده حجمها
ع الطاعة بنعين بعضنا
والصدق دا من طبعنا
إبن الحلال المحترم
آيه ونموذج فى الكرم
